Í draumi sérhvers manns er fall hans falið

Töfrar vors og vængja  

eða varhugaverður draumur?

 

Í draumi sérhvers manns er fall hans falið.
Þú ferðast gegnum dimman kynjaskóg
af blekkingum, sem brjóst þitt hefur alið
á bak við veruleikans köldu ró.

Þinn draumur býr þeim mikla mætti yfir
að mynda sjálfstætt líf, sem ógnar þér.
Hann vex á milli þín og þess, sem lifir,
og þó er engum ljóst, hvað milli ber.

Gegn þinni líkamsorku og andans mætti
og öndvert þinni skoðun, reynslu og trú,
í dimmri þögn, með dularfullum hætti
rís draumsins bákn og jafnframt minnkar þú.

Og sjá, þú fellur fyrir draumi þínum
í fullkominni uppgjöf sigraðs manns.
Hann lykur um þig löngum armi sínum,
og loksins ert þú sjálfur draumur hans.

Steinn Steinarr

                                  

Vorhátíð í Hastings

Athugasemdir

[Elín Katrín Rúnarsdóttir. , 6.5.2008 kl. 08:27]

Ég elska Stein Steinarr. Hann var einnig uppáhalds skáld Föður elstu barnanna minna og móðir hans. Þegar hann lést 2005, fékk hann hvílu við hlið móðir sinnar í Gufuneskirkjugarði og ég valdi lítið brot úr ljóði eftir Stein Steinarr og er það nú á leiðinu þeirra mæðgna. Brotið er svona: Hér hvíla þeir sem þreyttir göngu luku í þagnarbrag, ég minnist tveggja handa er hár mitt struku einn horfinn dag.

Takk fyrir kvittið mín kæra og já, myndir koma seinna

[Helga Guðrún Eiríksdóttir, 6.5.2008 kl. 12:09]

Já, Elín, ég ólst upp með hann í fanginu líka en fyrir utan ljóðaást mína á honum þá var hann langömmubróðir dóttur minnar.. pínu langsótt en engu að síður  

Þetta ljóð sem þú valdir fyrir barnsföður þinn heitinn þekki ég vel, það er hljóðlátt og fallegt og mjög vel viðeigandi á legstein. Eigðu góðan dag, Sprella mín.

[vera (IP-tala skráð) 30.1.2010 kl. 02:22]

http://vimeo.com/7939952